കൈരളിയോടും മീഡിയാ വണ്ണിനോടും ”കടക്ക് പുറത്ത്” പറഞ്ഞ് ഗവർണർ; തനിക്കെതിരെ വ്യാജ പ്രചാരണം നടത്തുന്നവരോട് സംസാരിക്കാൻ താത്പര്യമില്ലെന്നും ആരിഫ് മുഹമ്മദ് ഖാൻ

കൊച്ചി : കൈരളി, മീഡിയാ വൺ എന്നീ ചാനലുകളോട് കടക്ക് പുറത്തെന്ന് പറഞ്ഞ് ഗവർണർ ആരിഫ് മുഹമ്മദ് ഖാൻ. പാർട്ടി കേഡറുകളായി പ്രവർത്തിക്കുന്നവരോട് തനിക്ക് ഒന്നും സംസാരിക്കാനില്ലെന്നും ഇരു ചാനലുകളെയും പ്രതിനിധീകരിച്ച് എത്തിയവർ ഉടൻ പുറത്ത് പോകണമെന്നും ഗവർണർ പറഞ്ഞു. കൊച്ചിയിൽ മാദ്ധ്യമങ്ങളെ കാണാനെത്തിയപ്പോഴാണ് ഗവർണർ കയർത്തത്

പാർട്ടിക്ക് വേണ്ടി പ്രവർത്തിക്കുന്നവരോട് താൻ ഒന്നും സംസാരിക്കില്ല. കൈരളി മീഡിയാ വൺ എന്നീ ചാനലുകളോട് താൻ സംസാരിക്കില്ല. കൈരളിയുടെ ക്യാമറ ഇവിടെ കണ്ടാൽ താൻ സംസാരിക്കുന്നത് നിർത്തി പോകുമെന്നാണ് ഗവർണർ പറഞ്ഞത്. മീഡിയാ വൺ റിപ്പോർട്ടറോടും ഗവർണർ പുറത്ത് പോകാൻ പറഞ്ഞു.

ഈ രണ്ട് ചാനലുകളും തനിക്കെതിരെ ക്യാമ്പെയ്ൻ നടത്തുകയാണ്. പാർട്ടിക്ക് വേണ്ടിയാണ് അവർ ഇത്തരംവ്യാജ പ്രാചരണങ്ങൾ നടത്തുന്നത്. അതുകൊണ്ട് തന്നെ അവരോട് സംസാരിക്കാൻ താത്പര്യമില്ലെന്നും അദ്ദേഹം പറഞ്ഞു. ഇരു ചാനലുകളെയും പ്രതിനിധീകരിച്ച് എത്തിയ റിപ്പോർട്ടർമാരും ക്യാമറാമാന്മാരും പുറത്തുപോയ ശേഷമാണ് ഗവർണർ സംസാരിക്കാൻ തുടങ്ങിയത്.